A radio difusaia l\u2019ultimi canzoni pupulari, in inglesu e in talianu, ch\u00ec faciani badd\u00e0 in i discutechi e i festi paisani. I finestri aparti, l\u2019aria caldu intraia in l\u2019abitaculu, accurtendu i cunvarsazioni. I pneumatichi arrampicaiani l\u2019asfaltu in i giri. Picculi petri erani pruiettati in l\u2019arba ch\u00ec custighjaia a strada. I culturi, ch\u00ec s\u00ec stindiani annantu \u00e0 parechji ettari, erani secchi, i tarri inghjalliti e duri cum\u2019\u00e8 a petra. A Marana facia u pienu duranti \u2018ssi tr\u00e8 sittimani. Tutti i stabilimenti, camping, lucazioni, usterii di bor di mari, erani cumpleti fin\u2019\u00e0 u 15 d\u2019austu, u gran ritornu, a rinfriscata di Santa Maria. Fin\u2019\u00e0 qu\u00e8, u litturali era pupulatu di parasoli, di jet-ski e di transati in plasticu. S’ingaghj\u00f2 in una strada in tarra. Andaghjia pi\u00f9 pianu. Ingiru, una machja di piaghja mischiata c\u00f9 vistighji agrupasturali, pagliaghji, chjosi e vaschi di petra dund\u2019\u00ec biiani l\u2019animali. Versu u miziornu s\u2019innalzaiani filari di casali mudarni. Adumbraiani picculi insemi di casi individuali. Un culleghju, dui o tr\u00e8 spiziarii. Supr\u2019\u00e0 u mari un avvi\u00f2 facia a so manovra d\u2019avvicinamentu.<\/p>\n\n\n\n
Spensi u muttori e si pachighj\u00f2 suttu \u00e0 un castagnu sfundatu. L\u2019aria era pisiu, cum\u2019\u00e8 quandu u celu cuvaia un timpurali. Purtanti oghji i nuli erani pochi e micca, u soli spampigliuleghja e i monta supranaiani tuttu quissu senza velu. Unu sguardu brevu in dirizzioni di a pista, nimu. A cappedda. A pudiamu induvin\u00e0 da a strada, u so tettu rifattu c\u00f9 tighjali ricenti, i mura ch\u00ec spuntaiani da i lamaghjoni. Apr\u00ec a porta, fendu attinzioni \u00e0 u chjavisteddu arruvinatu da u tempu e u sminticu.<\/p>\n\n\n\n
Un lumu debbuli e inghjallitu pinitria in a cappedda, rispichjendusi annantu \u00e0 u pavimentu ammaccatu. I banchi di legnu \u00f9n aviani sirvitu dapoi anni. \u00d9n erani troppu frustati, cunsarvati in l\u2019immubilit\u00e0 bughjicosa di \u2018ssi mura. Feci u segnu di croci. Induva era u Cristu ? Supra \u00e0 l\u2019altari \u00f9n ci era. E mill\u2019anni f\u00e0 ? \u00c0 ch\u00ec si pudia assumidd\u00e0 u Cristu di \u2018ssa cappedda, dund\u2019\u00ec fecini i so passa i primi cristiani di l\u2019isula ? Marchjaia annantu \u00e0 pezzetti di vetru. \u2018Ssu caminu, in u silenziu e a mez\u2019uscurit\u00e0, u facia din\u00f2 annantu \u00e0 i passa di \u2018ssi cristiani antichi. Quiddi isulani senza noma, facci scancillati, populu senza razza ch\u00ec era u risultatu di affruntamenti mediterranei, eppuru sicuramenti rumanu e latinu, ghjera \u2018ssa ghjenti, povara o micca, piscatori, pastori, militari, burghesia e nubilit\u00e0 pisana di sicondu rangu, ch\u00ec t\u2019avia tracciatu \u2018ssu caminu, ch\u00ec t\u2019avia didicatu \u2018ssi mura e lu so cuntinutu \u00e0 San Parteu, cumpagnu di Santa Ristitudina. Parteu ghjuntu da u mari, da Cartagena l\u2019Africana, rilasciatu da Dioclizianu e sbarcatu c\u00f9 Ristitudina in Calvi, eppo\u2019 chjappatu parch\u00ec furisteru e tombu parch\u00ec cristianu. U martiru San Parteu, primu vescu di Mariana \u00e0 u quatresimu seculu, avia guidatu i cristiani, i primi, quiddi ch\u00ec muriani annantu \u00e0 i croci, o u capu taddatu, parch\u00ec vuliani un Diu unicu e un fiddolu chjamatu Ghjis\u00f9 Cristu.<\/p>\n\n\n\n
Avali u vidia \u00e0 San Parteu. I narbichi suttu \u00e0 i so ochja. A so scialbidezza. T\u2019avia un surrisu chetu e l\u2019ochja neri. I so mani posti annantu \u00e0 i spaddi d\u2019un fideli, parlaia \u00e0 meza voci, rassicurendu i pi\u00f9 spavintati. In a piaghja di Mariana, intorru \u00e0 i so loca di prighera e di vita, faciani u granu, i meli e qualch\u00ec ligumi malgradu i tarri rinicci. Picculi purceddi curriani in i compuli. Custighjiaiani i bandi di vacchi e di capri. Di notti, si ritruvaiani in u silenziu di a ghjesgia. U piccatori s\u2019avvicinaia solu, nudu, ciuttendusi in a vasca circularia, l\u2019acqua fredda fin\u2019\u00e0 u sternu. U battesimu era fattu e l\u2019omu surtia cristianu. Tuttu u mondu addurmintitu, Parteu si mittia \u00e0 u so scagnu. Cuncintratu, lighjia e cupiaia i maniscritti ch\u2019iddu avia pussutu salv\u00e0 in Cartagena. A stedda mattutina vighjaia annantu \u00e0 i so parucchiani. In u celu, ancora freddu d\u2019aprili, u luciori di a luna piena chjariscia u so visu. Paria dighj\u00e0 un santu. Fighjulaia a pussibilit\u00e0 vicina di a morti c\u00f9 sirinit\u00e0. A so opara era qu\u00ec, u so viscuvatu, a piaghja ch\u00ec si sviluppeghja, l\u2019insignamentu ch\u2019iddu deti sapendu a minaccia ch\u00ec rundighjaia. A so vita \u00e0 Parteu, prubabilmenti urighjinariu d\u2019Africa di u Nordu, a siguitemu mali. Iddu era un santu. Si feci ammazz\u00e0 da i rumani, in Corsica o in Cartagena, e fubbi sepellitu qu\u00ec, in San Parteu, quidda paleucristiana, ricuparta da \u2018ssa cappedda ch\u2019omu induvinaia ghjunghjendu da a strada, ligamu tr\u00e0 u mondu rumanu anticu e u mediuevu pisanu. Aggrinz\u00ec l\u2019ochja fighjulendu l\u2019absidi. Eppo\u2019 suttu \u00e0 i so peda. A tristizia l\u2019invad\u00ec. Pinseti \u00e0 \u2018ssa notti calma in a piaghja di Mariana. Fora, solu par turmint\u00e0 a veghja silenziosa di u Santu, cantighjulaia un aceddu. Un rumurucciu d\u2019acqua quandu un ghjacaru trapasseti a vadinedda ch\u00ec curria \u00e0 i peda di a dimora di Parteu. Chjosi u so quadernu e spensi a fiamma ch\u00ec lucicaia in l\u2019aria senza ventu. U vinticeddu marinu gunfiaia i linzoli. L\u2019ultimi rumori di u f\u00e0 di a notti purtetini Parteu in u sonnu.<\/p>\n\n\n\n
<\/p>\n\n\n\n