L\u2019acu di l\u2019ariloghju ribumb\u00f2 tr\u00e0 i muri bianchi. U sulaghju bassu, i muri bioti, l\u2019aria cunfinatu e zeppu in u quali era difficiuli di movasi, carcu di calori, seccu e cripulatu. Un nuvulu di moschi vulaia e giruvultaia in stu spaziu assitatu. In a camara sculaia un filettu di lumera. U rutulimu di u vintilatori facia un soffiu ligeru, un rumori di fondu ch\u00ec rinfurzaia u turpori. Si rispiraia un aria viziatu. In carrughju s\u2019affistaia \u00e0 qualch\u00ec scunnisciutu. Santi di una notti, passaiani fantasimi ed ombri, evucati in un filu di cantichi, beneditti longu \u00e0 una prucissioni prufana. I pudiami veda calmi e tranquilli. L\u2019albori era sempri luntanu e u sonnu, iddu, l\u2019avia lasciatu inc\u00f9 certezza.<\/p>\n\n\n\n
Ripinsaia \u00e0 sta discussioni di tandu. S\u2019allungaia l\u2019ombra di a Casa di l\u2019Imbasciadori in u ghjardinu. Suttu \u00e0 l\u2019archi u silenziu era quasgi tutali, altiratu pocu e micca da i passi in i scali vicini. In i so ricordi cuddaiani visi impricisi, boci di martiri, e i trascineddi trasparenti duviani essa quiddi di qualch\u00ec anghjulu custodiu. I linzoli erani trosci battuli. Sagra li dicia torna a so pena. Fighjulaia i so ochja di carbonu. Di li paroli ch\u00ec surtiani da la so bocca \u00f9n capia nudda e vidia solu i so denti bianchi, i so labri pulputi e rusulini. Ad ugni muvimentu i so capiddi neri, mezi longhi caschendu ligeri annantu \u00e0 i so spalli, baddaiani in u calori buzzu e zeppu. Ricuddetini insemi. Li riviniani din\u00f2 i mani di Sagra. Sta manera brusca e imbrugliata di sprim\u00e0 c\u00f9 i cesti i so pinseri ch\u00ec \u00f9n truvaiani piazza e sensu in i so paroli. Facia circuli, tuccaia, mimaia. Sagra, la Sagra bedda e brusca, Sagra cara, ghjunta da tempi antichi, visu rumanu e cardinaliziu, Sagra di sti ghjorna divintati trasparenti, visu trasparenti, sonu e carri senza materia, elementi falzi, fatti da un imbuleghju di ricurdacci, Sagra cara e mea, ascultaia sempri, u sguardu vilatu ed ammugliatu. Fora. Richjappatu. Fora un rumurucciu di vita cuddaia fin\u2019\u00e0 a finestra, pinitrendu u so sonnu.<\/p>\n\n\n\n
Pi\u00f9 inghj\u00f2, cuparti di notti e inturrati da i licci vintosi, i cavaddali si pupulaiani di dimonia. Parlaiani \u00e0 l\u2019aminutu. Cuspiratori biblichi sparisciani in l\u2019acqui nieddi di la Murtuledda, vadina maladitta ch\u00ec si pirdia in un fondu di a vaddi. Un poghju pitrignu supranaia a vadinedda assiccata, suminatu di caseddi, mez\u2019abandunnati e tafunati. Salmi ridotti \u00e0 un silenziu eternu. Piattaiani i prima luciori di u ghjornu.<\/p>\n\n\n\n
Prima ch\u2019iddu turressi u chjarori di lu ghjornu, and\u00f2 \u00e0 mettasi appena d\u2019acqua nantu \u00e0 a faccia. Quandu si missi di pettu \u00e0 u spechju, nun si ricunnusc\u00ec . A so peddi fina e tralucenti lasciaia appariscia una reta di veni turchini, frisgiulendu i so buceddi, da lu baveddu magru e pinzutu fin\u2019\u00e0 l\u2019ochja ciaddi e inghjittati di sangu. F\u00f9 presu da una baracina, sfughjevuli ed intensa. Li si paria d\u2019av\u00e8 u ciarbeddu trapassatu da una lama ghjacciata. U rind\u00ec cecu una siconda. Quandu li rivensi a cuscenza s\u00ec truvaia \u00e0 tarra, affannatu e trosciu di sudori. Pass\u00f2 a so mani annantu \u00e0 a so bocca. Curria un filettu di sangu. Si rimessi in pedi e turr\u00f2 in a so camara. Li giraia u capu. S\u2019affundeti annantu \u00e0 i linzoli. I so maschetti si distesini. Fora \u00f9n c\u2019erani pi\u00f9 n\u00e8 Sagra n\u00e8 dimonia. I so suviddati \u00e0 iddu firmaiani intarrati, prufondi e sicreti. I stabbia cuntinuaiani di brusgi\u00e0 o d\u2019affundassi in u silenziu ghjinirali. I mattutini si pupulaiani sempri di salmi. E? U soli, i solda, i sirati durati e spampigliulenti sviaiani l\u2019attinzioni di tutti, in a suddisfazioni ghjinirali. Sunoni setti ori. \u00c0 i notti nieddi succidiani ghjorna senza fini.<\/p>\n\n\n\n