Aghju mandatu un missaghju à Suffìa. Ùn m’hà ancu rispostu, credu ch’ella mi snubeghja. Hè un peccatu, postu ch’ell’hè una di l’uniche parsone chì vuliu vede in paese.
Quand’eramu ghjuvanotti, aviamu passati e nostre vacanze in paese annantu à e piazze di a ghjesgia o di a scola, incù un brancu di ghjovanni fidati à u cliscè chì omu pò avè di a ghjuventù campagnola. Abbastanza alcolu incù pocu educazione, un umore baullu, un asgiu tremendu à andà ver’di l’assidiu incù, in soprapiù, una viulenza inaudita versu e femine da a parte di i masci. Eru u testimoniu imputente è stupitu di stu marasmu spripusitatu. Ghjera « to kill a mockingbird » senza a tenarezza simpatica è a scuperta di u mondu.
Tandu scelsi subbitu d’ùn cullà più in paese cà in uccasione rare, prifirendu à sta cumpania quella di Tintin è di Tryphon Tournesol in li vechji scatuletti di babbu.
Suffìa facia parte di sta banda. Pà e donne, a fascinazione pà a viulenza è l’arme lacava a piazza à una rilazione cumplessa incù u so corpu. O piuttostu, incù ciò ch’elle ne devianu fà. Quelle chì ognunu qualificava di manera seria seria di « lovie » ùn pruvavanu mancu di difendesi ne, mancu appena. Si dilettavanu ancu à intratene a so reputazione di bartulona. Suffìa era di quelle di quale « si dicia », di quale « si sapia in tutta a pieve » chì pratiche purcacce facia è incù chì partinarii vargugnosi.
Sò statu in una rilazione lestra incù una di e zitelle e più tuccate da stu fenonemu peripateticu stranu : Aurore. Eru statu, ci vole à dilla u so primu cumpagnu, u so primu basgiu… è sottu à l’impulsioni di Suffìa, durante una partita d’azzione o verità messa in ballu pà l’uccasione, eru ancu statu a so prima sega. Daret’à una ghjesgia d’altrondi.
Dopu m’avè lacatu pà ùn sò più chì raghjone, Aurore dicia à quale a vulia sente ch’ella praticava e fellazione in tuttu lu rughjonu o incù masci d’Aiacciu : à quale l’avaria scrizzatu in bocca à quale annantu à i petti. Cuntava davant’à un’assamblea spalancata di risu induv’è sediavu, murtificatu, ch’ella avia chjavatu incù dui tippi à tempu è… ditagli i vi risparmiu.
Aghju capitu annu chì tuttu què ùn eranu cà fole infame ch’ella avia invintatu pà un scopu misticu. Rendemi ghjilosu forse, ùn m’arricordu micca s’ellu avia viaghjatu. Ùn credu micca. In fin di contu, aviu cuntinuatu à vede donne, à avè sturiette allora ch’ella (u mi cunfessaria più tardi) avia cunnisciutu pocu omi.
Sta dichjarazione fatta in la mio vittura dopu ch’ella avessi rispintu e mio avanze indulente m’avia fattu rincunsiderà e zitelle di u paese : s’ella l’avia fintu, podarsi l’altre finghjianu dinò ? Chì ne era di quelle ch’ùn avianu mai dettu nulla ?
Di tutta manera, ùn aviu micca privistu di chjamà à Aurore cust’annu. Dopu à sta prova d’abbracciata nustalgica in la mio vittura, m’avia datu pirochji. Aviu intarpritatu st’infestazione cum’è un segnu di mal sorte, cum’è un avertimentu di pettu à a criatura infernale chì sbucciaria d’una rilazione supposta trà di noi.
Suffìa m’era in tantu sempre più piaciutu cà ella è, una mossa ver’di ella si devia fà senza Aurore. Eranu, certu diciarianu, amiche care è annu, aviu basgiatu Suffìa tandu chì l’altra era in la stanza d’accantu, ind’è mè durante una briachina. Aghju prima di tuttu pinsatu uttene in fine u sacramentu di un « plan à trois », genaru di medaglia ulimpica di ogni omu ch’ùn sia assessuatu. Ci vole à crede chì u vinu m’avia scalzatu u ghjudicamentu chì, da u lindumane mancu una di e duie ùn rispundia più à i mio missaghji.
E donne parlanu trà di elle, mi ne scordu troppu spessu.
Laisser un commentaire