#1 CILESSU
Quissu corpu sculuritu,
È laceratu di Cristu
Eccu lu u salvamentu
Quellu d’u mio estru tristu
Quissa croce di cipressu
Pece è sangue in e narice
Quessi chjodi cum’ erpice
Pela bianca di cilessu
Hè l’agnellu d’u Signore
Ch’arricata u pecatore
Hè l’eternu fattu omu
Ancu à morte l’hà domu
#2 CUMPAGNU
O lu me caru cumpagnu
Tu chì mi senti cantà
Senti puru lu me lagnu
Ascolta u me bramà
A me voglia di luttà
Di dumà i me dimonii
A me voglia di dumà
Quella mea dipressioni
U tufonu abbughjatu
Chì mi brusgia i minucci
U mio core affanatu
S’assirena in a luci
#3 CAMPANA
Quandu sentu una campana
U me estru s’invargogna
Chi so stati anni è anni
Da l’ultima cunfessione
U me core si svincula
Sott’i peccati pisivi
E l’anima hè a spula
Di stu penzà invasivu
Vogliu and’à u San Petru
O puru in Lavasina
Rassirina u mio estru
E a me fede mischina
Laisser un commentaire